இரண்டு நாள் பருவமழையால் நிரம்பும் நிலையில் பெரிய ஏரி

வார இறுதியில் பெய்த வடகிழக்குப் பருவமழையால் இராசிபுரத்தின் கிழக்கு எல்லையில் உள்ள பெரிய ஏரியின் நீர்மட்டம் அதன் கொள்ளளவில் சுமார் 85 சதவீதத்தை எட்டியுள்ளது. இது கடந்த மூன்று ஆண்டுகளில் இல்லாத அளவாகும். ஏரிப் பாசனப் பகுதி விவசாயிகள் இந்த நீர்வரத்தை வரவேற்றுள்ளனர். சம்பா நெல் சாகுபடிக்குத் தண்ணீர் உறுதியாகும் என்றும், அருகிலுள்ள வார்டுகளில் ஆழ்துளைக் கிணறுகளின் நீர்மட்டம் உயரும் என்றும் அவர்கள் தெரிவித்தனர். பலர் ஏற்கெனவே நாற்றங்கால் தயாரிப்பைத் தொடங்கியுள்ளனர். பொதுப்பணித் துறை ஊழியர்கள் ஏரிக்கரையையும் கலிங்கலையும் இரவு பகலாகக் கண்காணித்து வருகின்றனர். நீர்வரத்து அதிகமாக உள்ள நிலையில் உபரிநீர்க் கால்வாயில் குளிக்கவோ கால்நடைகளைக் கழுவவோ வேண்டாம் என்றும், குழந்தைகளை ஏரிக்கரைக்கு அருகில் செல்ல விட வேண்டாம் என்றும் பொதுமக்கள் அறிவுறுத்தப்பட்டுள்ளனர். சனிக்கிழமை இரவு 46 மி.மீ., ஞாயிற்றுக்கிழமை 31 மி.மீ. மழை பதிவானது. வரும் வாரத்திலும் மழை தொடர வாய்ப்புள்ளது.